bloggið

held að ég sé hætt í bili...eða þangað til ég finn bloggandann aftur...

glorí glorí manjúnæded

komin heim frá manchester. æðisleg ferð en heldur rólegri en sú síðasta;) við sátum á fimmta bekk frá hliðarlínunni og ca 20 metra frá ferguson og félögum. eins átti ronaldo nokkra lipra spretti upp kantinn, beint fyrir framan nefið á okkur! við vorum soldið eins og krakkar í disney world:) núna er mánuður í næstu ferð.

við í hamri fórum á laugarvatn í gær til að keppa á heimsmeistaramóti sveitamanna (hsk). frammistaðan var frekar slök af okkar hálfu í heildina. við náðum fjórum góðum hrinum af átta. mér gekk sjálfri ágætlega, svona miðað við æfingaleysi undanfarið. það var samt eitt móment sem stóð upp úr. ég var upp við netið á miðjunni og búin að taka á móti fyrsta bolta, sem var stuttur. ég sá kantinn okkar og hélt að hún ætlaði að smassa boltann yfir og ákvað því að bakka svo ég væri ekki fyrir henni. ég tók eitt, tvö skref og BANG!!! haldið þið að steinunn, sem er uppspilarinn, hafi ekki hlaupið aftan á mig!! og þar sem ég er stórbeinótt, rauðhærð, freknótt og auk þess á túr, að þá flaug hún náttúrlega beint í gólfið og allir tóku andköf á vellinum. "ertu í lagi?!" - "braustu nokkuð rifbein?!" - "eru tennurnar á þér heilar?!" en, nei, það spurði mig enginn. enda er ég, eins og ég sagði þegar ég var lítil, gille beppa (dugleg stelpa). svo er það 3. deildin um helgina í mosó. það verður sko stuð. vonandi heldur ökklinn, sem var orðinn mjög tæpur undir það síðasta.

það gengur alltaf jafn vel með rb. hann er reyndar orðinn ótrúlega mikill prakkari. hann læðir sér stundum í dvd hillurnar, lítur við og athugar hvort við föttum eitthvað. hann tekur einn disk út og sér svo að við erum á leiðinni. þá gjörsamlega sópar hann úr hillunum skríkjandi eins og við séum í kapp. ótrúlega stoltur.

ég ætla núna að vera duglegri að blogga. næsta færsla kemur fljótlega.

kolla...sem elskar að keppa í blaki

vöknuð

af værum blundi...eða áfengisdauða, þið megið ráða.

jú, ég er víst komin heim frá frakklandi og er rétt nýbyrjuð að finna aftur bragðið af matnum. áður bragðaði allt eins og bjór. ef þið viljið nánari útskýringu á þessu tuði í mér þá getið þið einfaldlega skoðað frakklandsmyndirnar á feisbúkk. ferðin var annars algjört brill og það er mikið búið að rifja upp ógleymanleg móment úr henni. einhverra hluta vegna kem ég stundum þar við sögu en þið munið ekki lesa neitt um það hérna og heldur ekki á feisbúkk, þar sem myndirnar segja sko ekki alla söguna;) annars var ég bara mjög stillt og gerði ekkert af mér. þið eigið alltaf að trúa þeirri útgáfu, ok?

það hefur alveg ótrúlega margt gerst síðan ég bloggaði síðast. bankar, fyrirtæki og einstaklingar orðið gjaldþrota eða stefna í þrot og selfyssingar geta ekki keypt sér gjaldeyri í heimabæ sínum. það finnst mér algjör brandari! við keyptum gjaldeyri í dag þar sem við ætlum ekki lenda í einhverjum kreditkortaævintýrum í manchester (smá tilvitnun í frakklandsferðina:). við erum s.s. á leiðinni til manchester núna á föstudaginn og komum heim á mánudaginn. aðalástæða ferðarinnar er að fara á leik mu-wba á laugardaginn. ég er reyndar svo klikk að ég fór á netið í dag til að skoða hvaða leikir væru á dagskrá um helgina og við hverja united ætti að spila. döh! það er kannski ekki alveg runnið af mér...

í þessari viku og næstu er ég á fullu í vettvangsnámi í varmárskóla. gærdagurinn var hundleiðinlegur en dagurinn í dag var skemmtilegur þannig að ég hlakka til að fara aftur á morgun. ég er reyndar að vinna til 2 í nótt þannig að það verður ekki auðvelt að vakna í fyrramálið:/

svo er verið að kjósa besta knattspyrnumann íslands frá upphafi í kvöld. mér finnst frekar augljóst hverjir verða í þremur efstu sætunum. það verða albert guðmundsson, ásgeir sigurvinsson og eiður smári. annað yrði skandall. ég kaus ásgeir. svo vil ég eið í annað og albert í þriðja. lemur í kjós.

já, eitt soldið sérstakt sem ég gleymdi að minnast á. vettvangsnámið mitt er í gamla skólanum mínum í mosó, gaggó mos. þegar ég var í 8. bekk þá fékk ég í fyrsta skiptið þá hugsun í kollinn að ég gæti verið samkynhneigð. það var í október eða nóvember 1992 og ég man nákvæmlega hvar ég stóð og hvað "varð til þess" að ég hugsaði fyrst út í þetta. ég ætla reyndar ekki að segja ykkur það;) ég stóð þar aftur í gær til að rifja upp gamla tíma og mér leið hálf kjánalega. en mér fannst það líka soldið gaman. ég stoppaði hinar stelpurnar, stóð á staðnum og sagði "jæja stelpur, hérna fattaði ég fyrst að ég væri lesbía." Þær alveg "jáááá kolla, fræðandi." mér fannst það alla vega mjög merkilegt. spes.

fékk smá ritræpu.

að lokum ætla ég að birta ljóð eftir sjálfa mig sem ég samdi um daginn eftir allt "efnahagshrunið":

farið allt sem átti ég forðum
fangið nakið, sálin tóm
gamall heimur genginn úr skorðum
gráhærður orðinn af eilífum áhyggjum

hér var allt en svo er ei lengur
auðir bekkir, engin hljóð
horfinn lífsins farsæli fengur
ég fæst ekki til þess að gleyma

ó

hvar er draumurinn
hvar ertu lífið sem ég þrái
ó, ó, eilífðin
hvar eru gleði mín og sorg
hvar er draumurinn

verið góð hvert við annað, krakkalakkar


kolla...sem skrifar alltaf soldið í staðinn fyrir svolítið, get used to it:)

lesbía á leið til parísar

loksins, loksins.

skólinn er núna kominn á fullt og ég er svona nokkurn veginn komin með námskeiðin mín á hreint. ég tek 17 einingar á þessari önn, sem er rétt rúmlega fullt nám. ég er í fjórum fögum og þar af verða tvö þeirra í fjarnámi, en það kom reyndar ekki í ljós fyrr en í fyrstu vikunni. allt í lagi með það. ég ákvað þá í kjölfarið að skrá þriðja fagið í fjarnám, þótt ég væri pínu smeyk við það, þannig að ég er núna bara í einum tíma á viku. það er gítarkennsla, vúhú:) enn sem komið er hef ég verið nokkuð samviskusöm. ég hef aldrei verið með neitt sérstaklega góðan sjálfsaga og þess vegna er þetta ákveðin áskorun fyrir mig.

um daginn þurfti ég að hnerra við skrifborðið. ég sneri mér til hliðar, í áttina að veggnum og aaatsjúúú!! veggurinn varð appelsínugulur eftir paprikuna sem ég var að borða. ég segi bara guð sé lof að ég var í fjarnámi. annars hefði einhver fengið þetta í vinstra eyrað sitt. oj.

mamma á afmæli í dag. til hamingju með afmælið:) hún er ekki gömul. bara 48 ára.

það eru sex dagar í frakklandsferðina. við verðum fyrstu tvo dagana í parís. svo förum við í langa rútuferð...var ég kannski búin að segja frá þessu ferðalagi? æi, ég man ekki neitt. alla vega. það er hvort eð er bara þrennt sem skiptir máli: 1) tónleikarnir með queen 2) frakkland-ísland 3) bjórinn. við erum 9 stelpur sem ferðumst saman. það verður leikur í gangi innan hópsins frá því við mætum í keflavík á miðvikudagsmorguninn og þangað til landsleikurinn klárast. í hvert skipti sem einhver okkar segir orðin "parís" eða "lesbía" þá þarf hin seka að borga 1 evru í sektarsjóð. við gerum svo eitthvað skemmtilegt saman á laugardagskvöldinu fyrir upphæðina sem safnast saman. þetta gæti orðið mjög athyglisverður leikur..."jæja, loksins erum við lesbíurnar komnar til parísar..." við komum svo heim á sunnudegi.

jæja, best að fara að koma sér í háttinn. mín bíður klipping kl. 15 á morgun

kolla...hendrix

oooh en sætar:)

ekki enn orðin þrítug

ein stelpa úr skólanum á foreldra sem eru fastir í útlöndum, þar sem flugfélagið fór á hausinn. "æ æ", segir hún. "en heppin", segi ég. þau lifa drauminn minn. það væri t.d. alveg sérstaklega gaman ef þetta kæmi fyrir mig í new york.

ég átti yndislegan dag á laugardaginn. ég var reyndar að vinna nóttina áður þannig að ég fékk fyrst að sofa út. eftir að hafa vaknað í sturtunni beið mín bakkelsi og afmæliskaka frammi í eldhúsi. við hámuðum það allt í okkur áður en við brunuðum í mosó til að horfa á stelpurnar mínar landa íslandsmeistaratitlinum:) þær eru svo miklir snillingar að það hálfa væri nóg og þær áttu þennan titil svo innilega skilinn. við eyddum svo restinni af deginum í bústaðnum hjá gunnhildi, einari og litlu ljósálfunum mínum. svo fór rb til pabbanna og við fórum út að borða með gunnhildi, einari, pabba og þóreyju á austur-indíafélaginu. geðveikt gott! síðan kíktum við með gunnhildi og einari á kaffihús þar sem við fengum stóran bjór á 550 kr!! það var eins og kreppunni væri lokið og árið 1999 væri komið aftur. en jæja. þaðan keyrðum við svo upp í mosó til að hitta fríðu og heiðu í afmælispartýi og þar sátum við og spjölluðum eitthvað fram eftir. þær fóru svo á ball en við fórum heim. æðislegur dagur. takk takk takk:)

það er enn til klósettpappír. samt gengur mér alveg rosalega vel að selja, með hjálp frá góðu fólki;) það er ekki séns að ég labbi upp á 3. hæð á eiffel turninum.
no njet nej ónei!

kolla...sem fannst alveg nógu erfitt að labba NIÐUR af 2. hæð turnsins!

þessi eru líka svona sniðug hahaha

þetta er samt uppáhaldið mitt...shut up drogba

sniðugt hahaha

þetta finnst mér fyndið:)

frædei

fyrsta vikan í skólanum er að klárast í dag. þessi önn er mjög spennandi. ef allt fer að óskum þá verður hún sú skemmtilegasta hingað til. var í dag í tíma í tjáningu og táknvísi. við vorum bara sjö í tímanum, þ.a. fimm margra barna mæður sem eru í fjarnámi. við vorum að tala um menningu barna og unglinga tengdri nýmiðlun. þessar fimm fóru hreinlega á kostum. ég náði að halda hlátrinum niðri en ekki brosinu. "stelpan mín kom heim um daginn og sagði bara: mamma, ég vil fá svona g-streng! og ég er alveg viss um að hún fær þessa hugmynd frá öllum tónlistarmyndböndunum í sjónvarpinu og hún er bara 6 ára gömul!" "já nei, þetta hefur engin áhrif á strákinn minn, hann horfir aaaaldrei á sjónvarpið, hann er BARA í tölvunni". alveg á innsoginu;)

svo í tímanum komst ég að því að ein þeirra sá viðtalið í kastljósi. hún horfði ekki á mig. nei, hún starði. mjööög augljóst. það fannst mér líka frekar fyndið:) þið skiljið s.s. núna af hverju þessi önn verður skemmtilegust...

í dag. fyrir nákvæmlega tuttuguogníu árum síðan, var ég bumbubúi. það heitir það alla vega nú til dags. ætli það orð hafi verið til þá?

á morgun, fyrir nákvæmlega tuttuguogníu árum síðan, hættu foreldrar mínir að vera unglingar. pabbi var nítján og mamma að verða nítján. þessir blessuðu unglingar á þeim tíma. þar sem fólk var ekki eins upplýst á þessum tíma eins og í dag þá hef ég stundum pælt í því hvort mamma hafi reykt á meðgöngunni. ég á það stundum til að finna reykingalykt.

það stefnir allt í það að afmælisdeginum mínum verði eytt fyrir framan imbann að horfa á jarðarför. aftur. allt í beinni á rúv. síðast þegar ég horfði á jarðarför á rúv var þegar díana ninpressa var jörðuð. það var 6. sept 1997. þá var ég reyndar þunn. og bjó hjá pabba. og með stutt hár. en samt alveg rauðhærð. svo dó pavarotti 6.sept í fyrra.

kolla...farin í mötó

kmk

ég hef stofnað nýja bloggsíðu fyrir blakliðið mitt (kmk) og ákvað í tilefni af nýju tímabili að klára smá myndband sem ég hafði byrjað á í vor. ég setti saman myndir frá síðastliðnum árum saman við nokkra lagabúta og þetta er árangurinn (ef það hikstar hjá ykkur þá væri ekki vitlaust að leyfa því að rúlla einu sinni í gegn, án þess að horfa á það, og byrja svo upp á nýtt):



ekki gallalaust en ég nennti ekki að fínpússa það 100%.

kolla...ekki gallalaus

jæja, hvar á ég að byrja

jesús minn almáttugur! guð minn góður! jesus christ on a bike! verst að ég trúi ekki á þá.

ég talaði ekki allan tímann. þetta var bara svona "skemmtilega" klippt hjá þeim. hinum þremur í þessu viðtali fannst það bara ALLT Í LAGI. sem betur fer klipptu þeir út svarið mitt þar sem ég gleymdi því sem ég ætlaði að segja. ég var lengi með móral út af því. uppáhaldsbúturinn minn í þessu viðtali var þegar orri hélt á reyni í eldhúsinu. það var eitthvað svo fallegt. ég táraðist næstum því. en sætt.

ok, það var aðeins skárra að horfa á þetta í annað skiptið. þá talaði ég ekki eins mikið...nei djóóóók!

á fjórðu spurningunni vonaðist ég reyndar til þess að ég myndi ekki svara henni líka. en það breyttist víst ekkert á rúv plús.

jæja

getur einhver sagt mér hvað roger waters (pink floyd), nina persson(the cardigans) og sverrir stormsker (einkavinur snúlla) eiga sameiginlegt? svör óskast.

kolla...bla bla bla

bráðum september

skólinn byrjar á morgun. loksins. er orðin mjög spennt. það hefur gengið ágætlega að selja gömlu skólabækurnar mínar og það lítur út fyrir að ég þurfi ekki margar fyrir þessa önn. hjúkket. en núna er ég komin í annan skóla. skólann sem ég ætlaði mér aldrei að fara í. aldrei að segja aldrei.

september er loksins að koma. auðvitað bestasti mánuðurinn. ágúst og september eru uppáhaldsmánuðirnir mínir. þá byrjar sumarið að hverfa hægt og rólega og haustið mætir í staðinn. þá er allt eitthvað svo ferskt og fallegt. svo á ég líka afmæli en það er algjört aukaatriði...ég var að vinna fjórar vaktir í þessari viku og þarf að vinna fimm vaktir í næstu. ég þarf að vinna á afmælisdaginn minn. ég geri það aldrei. ég fæ engan til að vinna fyrir mig. grátur.

núna erum við á fullu að skoða mögulega staði fyrir næsta sumarfrí. það er reyndar bara eitt land sem kemur til greina. ég hef aldrei farið þangað en mig hefur alltaf dreymt um það. uppáhaldsknattspyrnumaðurinn minn er þaðan. við ætlum að leigja hús og vonandi vill einhver koma með okkur. það yrði bæði skemmtilegra og ódýrara. reyndar kostar þetta ekkert svívirðilega mikið. ef við fáum 1-2 fjölskyldur með okkur þá myndi þetta kosta miklu minna en hótelgisting. sjáum til hvað verður.

ef þið eigið bækur eftir/um ástu sigurðardóttur og þið viljið selja þær þá er ég áhugasamur kaupandi.

kolla...sem hlakkar til að verða þrítug

silver

já, ef einhver hefði boðið okkur silfrið fyrirfram, þá hefðum við öll þegið það með þökkum. frábært hjá strákunum.

ég er að safna orku. orku til að semja bréf til frönsku miðasölunnar sem seldi okkur miðana á queentónleikana. eftir að ég keypti miðana þá fékk ég sent bréf þar sem ég var beðin um að senda ljósrit af vegabréfinu mínu og kreditkortinu, ásamt staðfestingu á heimilisfangi svo þeir gætu SENT MIÐANA HEIM TIL MÍN. ég fékk vinkonu mína í parís til að hringja í þá til að vera viss um að þetta væri ekki eitthvað fúsk og það reyndist svo allt vera í lagi. ég sendi þeim þá þessar upplýsingar í tölvupósti um daginn og var að fá svar í gær. þeir segja að það sé enginn tími núna til að senda þessa miða til mín! halló! hvenær tók það póstinn meira en mánuð að fara frá frakklandi til íslands??????? þeir vilja að ég sæki miðana í einhverja tónlistarverslun í parís. sjitt, hvað ég varð reið. ég er ennþá reið. ég ákvað í gær að ég myndi bara senda þeim bréf til baka og segja að ég sætti mig ekki við þetta og heimta að fá miðana senda. það er verið að hafa mann að fífli. svona eins og hjá kastljósi.

(tók smá pásu. er búin að senda bréfið. komst í ham þegar ég skrifaði um þetta. kannski fáið þið framhald í næstu færslu?)

ég vil taka það fram að það eru tvær umferðir búnar í enska boltanum og ég er ekki ennþá farin að væla um áskrift. já, hver hefði nú trúað því?

ég setti nokkur af mínum uppáhaldslögum með dave matthews band á fóninn. það er aðallega til að minnast leroi, saxafónleikara bandsins. hann dó 19. ágúst. rip. svo fyrir áhugasama þá getið þið farið á youtube og slegið inn leitarorðið bossablossi. þá getið þið séð nokkur myndbönd sem ég hef tekið á tónleikum með dave matthews band, dave matthews, evu dahlgren og audioslave. ef ég hefði ekki týnt minniskortinu mínu í sumar þá hefðuð þið líka getað séð myndbönd frá radiohead (sem var ógeeeeðslega töff!), neil young, duffy og kings of leon...grááááááááááátuuuuuuuuuur:(

ætla að fá mér trópí.

kolla...swing

í dag er fæðingardagur ömmu kollu. hún hefði orðið 67 ára. hún dó árið 2002 úr krabbameini. ekki gömul. ég sakna hennar oft. ég hugsa oft til hennar þegar ég hlusta á morgunútvarpið á rás 2. það minnir mig á þegar ég heimsótti hana þegar hún var dagmamma. skrítið.
hérna er rosa flott mynd af ömmu og afa, sem var tekin 1959. með þeim er jói, bróðir mömmu, en mamma fæddist svo ári síðar.

kolla...carlsen

semi semi

"þetta er bara one step up the mountain", eins og óli sagði. er til betri leið til að vakna almennilega á morgnana? er hægt að biðja íslenskan markmann um betri markvörslu? er hægt að vera oftar manni færri inn á vellinum í einum leik? er ekki alveg dásamlegt að vera komin í undanúrslit á ól?

ég er með kenningu um af hverju björgvin er búinn að verja svona vel. þessa kenning kom sko upp eftir fyrsta leikinn gegn rússum. hversu meira sænskt getur eftirnafnið hans verið? Gustavsson. Ef það stendur Gustavsson á markmannstreyju þá er ekki annað hægt en að vera góður í marki!

nóg að gera í dag. best að koma einhverju í verk. og áfram ísland.

kolla...bíður bara og bíður